Tuesday, 5 December 2017

காலபைரவரின் அனுமதி இருக்கா?



நவக்கிரக வழிபாட்டை முடித்த பின் நேராக இராமேஸ்வரம் போய் இறங்கி விடக் கூடாது. இராமேஸ்வரத்திற்குள் நுழையும் முன் காவல் தெய்வமாக பாம்பனில் இருக்கும் பைரவரிடம் அனுமதி பெற வேண்டும். அப்படி அனுமதி பெறா விட்டாலும் நிகழும் என்ன நிகழும்? 

இராவண வதம் முடிந்ததும் பிரம்மஹத்தி தோசம் நீங்க சிவபூஜை செய்ய இராம நினைத்தார். அதற்காக ஒரு சிவலிங்கத்தை கொண்டு வரச் சொல்லி அனுமனை அனுப்பி வைத்தார். லிங்கத்தை தேடி வானில் பறந்தவர் காசி எல்லைக்குள் நுழைந்தார். சிவபூஜைக்கு வேண்டிய சுயம்பு லிங்கத்தை தேடி வந்தவருக்கு காசி முழுக்க லிங்கங்களாய் இருப்பது தெரிந்தது. இதில் எது சுயம்பு லிங்கம் என அவரால் அடையாளம் காண முடியவில்லை. களவாடியோ, கவர்ந்தோ போக வந்த அனுமனுக்கும் கொஞ்சம் அதிர்ஷ்டம் இருந்தது. கருடன் ஒரு லிங்கத்தை மட்டும் தன் பங்குக்கு வட்டமிட்டுக் காட்ட பல்லியோ அந்த லிங்கத்தின் மீது அமர்ந்து வாலாட்டிக் காட்ட சுயம்பு லிங்கத்தை அடையாளம் கண்டு கொண்ட அனுமன் ஆனந்தமடைந்தார். தன் பலம் பொருந்திய கரங்களால் அந்த லிங்கத்தை தூக்க முயன்றார். 

Monday, 20 November 2017

நன்மைகள் நல்கிடும்(ராம) நவக்கிரகங்கள்!



அசுரர்களின் அரசனான ரம்பா என்ற அசுரன் ஒருநாள் நதிக்கரையோரம் வந்து கொண்டிருந்தான். அந்நதியில் ஒரு பெண் எருமைமாடு குளித்துக் கொண்டிருப்பதைக் கண்டான். முற்பிறவியில் அழகிய இராஜகுமாரியாக இருந்து சாபத்தால் எருமையாக மாறியிருந்த அந்த பெண் எருமையின் மேல் மையல் கொண்டு தன்னை ஒரு ஆண் எருமையாக மாற்றிக்கொண்ட ரம்பா அதனுடன் கூடி மகிழ்ந்தான். உருவில் எருமை மாடுகளாக இருந்த அவ்விருவருக்கும் பிறந்தவன் மகிஷாசுரன். மற்றவர்களை துன்புறுத்திப் பார்ப்பதிலேயே சுகம் காணும் அசுரகுலத்தில் பிறந்திருந்த போதும் அவனுக்குள்ளும் நல்ல குணங்கள் இருந்தது. படைப்புக் கடவுளான பிரம்மாவை நோக்கி கடும் தவமிருந்து மனிதனாலும், மிருகத்தினாலும் தனக்கு அழிவு வரக்கூடாது என்ற வரத்தைப் பெற்றான். வரம் பெற்றவுடன் அவனுக்குள் இருந்த பிறவி அசுரகுணம் வெளியே வர ஆரம்பித்தது. அசுரர்களுக்கு தேவர்களைக் கண்டாலே ஆகாது. சமயம் வாய்க்கும் போதெல்லாம் தேவர்களை வச்சு செஞ்சு விடுவதில் அசுரர்களுக்கு அலாதி பிரியம். அந்த குலத்தில் இருந்து வந்தவன் என்பதால் வானுலக தேவர்களை வதைக்க ஆரம்பித்தான். இந்திரலோகத் தலைவன் இந்திரன் மீது படையெடுத்து அவனை ஓடி ஒளியச் செய்தான். இந்திரனையே விரட்டியடித்தவனுக்கு தேவர்கள் எல்லாம் எம்மாத்திரம்? தினமும் அவனுக்கு அஞ்சி, அஞ்சி வாழ்ந்து கொண்டிருந்தனர். 

ஆண்களின் கண்களுக்குப் புலப்படாமல் தங்களைத் தொல்லை தந்து கொண்டிருக்கும் மகிஷாசுரனின் கொட்டத்தை அடக்கி அழிக்கக்கூடிய சக்தி பராசக்தியான அகிலாண்டேஸ்வரி தேவிக்கு மட்டுமே உள்ளது என்பதை தேவர்கள் அறிந்தனர். உடனடியாக தேவியின் பாதத்தில் சரணடைந்தனர். சரணாகதிக்கு மிஞ்சியது ஏது?  தன்னைச் சரணடைந்தவர்களின் துயரங்களைப் போக்க  தேவி முடிவு செய்தாள். 

Tuesday, 31 October 2017

வெற்றிக்கு அச்சாரமிட்ட வெயிலுகந்த விநாயகர்



பல வீடுகளில் மாமியாருக்கும், மருமகளுக்கும் ஒத்துப் போகாது. இருவருக்குமான உரசலில் அம்மா பக்கமா? மனைவி பக்கமா? என முடிவெடுக்கத் தெரியாமல் ஆண் விழி பிதுங்கிப் போவான். சில வீடுகளில் இந்த நிலை அப்படியே தழைகீழாக இருக்கும். மாமனாருக்கும், மருமகனுக்கும் ஒத்துப் போகாது. அப்பாவா? கணவனா? என முடிவெடுக்க முடியாமல் பெண் பரிதவித்துப் போவாள். மனித குலத்துக்கு மட்டுமே வாய்த்த இப்படியான சிக்கல்களில் சில சமயம் இறைவனும் சிக்கிக் கொள்வதுண்டு. 

சிவபெருமானுக்கும், அவருடைய மாமனார் தட்சனுக்கும் எப்பொழுதும் ஒத்துப் போகாது. ஒரு கட்டத்தில் மருமகனை மட்டம் தட்ட முடிவு செய்த தட்சன் மாபெரும் யாகத்திற்கு ஏற்பாடு செய்தான். தேவர்கள், முனிவர்கள், அரசர்கள், சித்தர்கள் என அனைவருக்கும் அழைப்பு விடுத்தவன் மருமகனை மட்டும் அழைக்கவில்லை. சிவபெருமான் தட்சனுக்கு மருமகனாய் இருக்கலாம். ஆனால் தங்களுக்குத் தலைவனில்லையா? ஈசனுக்கே அழைப்பில்லாத போது நாம் மட்டும் சென்றால் நன்றாக இருக்காதே எனத் தயங்கி நின்றனர். ஆனால், தட்சனின் செல்வாக்கும், முன் கோபமும் அவர்களின் தயக்கத்தை உடைத்தெறிந்தது. தட்சனின் அழைப்பை ஏற்று யாகத்திற்கு செல்ல முடிவு செய்தனர். பிரம்மா, சூரியன் உள்ளிட்ட பெருந்தலைகள் சூழ்ந்திருக்க தட்சன் யாகத்தை நடத்தினான்.
தன் கணவனைப் புறக்கணித்து தந்தை நடத்தும் யாகசாலைக்குள் நுழைந்த பார்வதி தேவியை மகள் என்றும் பாராமல் தட்சன் அலட்சியப் படுத்தினான். அவமானத்தோடு பிறந்த வீட்டில் இருந்து புகுந்த வீட்டிற்குத் திரும்பிய மனைவிக்கு ஆதராவாக சிவபெருமான் வந்தார். கோபத்தின் உச்சத்தில் யாகத்தை கலைத்து எறிந்தவர் கண்ணில் பட்டவர்களை எல்லாம் கோபத்தால் துளைத்தெடுத்தார். சூரியன் தனக்குக் கிடைத்த பாவத்திற்கு பரிகாரம் வேண்டி வன்னி மந்தார மரங்கள் சூழ்ந்த வனமாக இருந்த இடத்தில் தவமிருந்தான். அந்த இடம் உப்பூர்!

Sunday, 22 October 2017

புனித யாத்திரை புறப்படுவோம்!



மனிதனைப் புதுப்பிக்கக் கூடிய மிகப் பெரிய சக்தி பயணங்களுக்கு உண்டு. அந்தப் பயணத்தை பக்தி சிரத்தையாக புண்ணிய தலங்களை நோக்கி ஒருவன் மேற்கொள்ளும் போது அது “யாத்திரை”யாகிறது. ஒவ்வொரு மதமும் தன் மதத்தவர்கள் சென்று வருவதற்கென புனித இடங்களைக் கொண்டுள்ளன. அங்கு  தன் வாழ்நாளில் ஒரு முறையேனும் சென்று வர வேண்டும் என ஒவ்வொருவரும் நினைத்தாலும் அக்காலங்களில் அது அத்தனை சாத்தியமாய் இருக்கவில்லை. இன்றோ அத்தகைய நிலைமை இல்லை. அக்காலங்களில் செய்ய வேண்டிய பிரயாத்தனங்கள் இப்போது தேவையில்லை. நவீன வசதிகள் பயணங்களைப் போல யாத்திரைகளையும் எளிமையாக்கி விட்டன. வாகன வசதிகளால் வழித்தடங்களும், பயண நேரங்களும் சுருங்கின. இதனால் எல்லோராலும் நினைத்த நேரத்தில் யாத்திரைகளை மேற்கொள்ள முடிகிறது. 

யாத்திரையை ஆகமங்கள் தீர்த்த யாத்திரை, தல யாத்திரை என இரண்டாக வகைப்படுத்துகின்றன. தீர்த்த யாத்திரை என்பது புனிதமான நீர்நிலையை ஒட்டி அமைந்திருக்கும் இடங்களுக்குச் சென்று வருவதைக் குறிக்கும். தல யாத்திரை என்பது நீர்நிலையை ஒட்டியதாக இல்லாத திருத்தலங்களுக்குச் சென்று வருவதைக் குறிக்கும். தெய்வங்கள் அனைத்தும் நீரில் உறைவதாக வேதங்கள் குறிப்பிடுகின்றன. அதனாலயே ஆலய வழிபாடுகளிலும், தெய்வ காரியங்களிலும் இறைவனை நீரில் ஆவாகனம் செய்கின்றனர். அப்படி இறைவன் உறைந்திருக்கும் புண்ணிய நதிகளை நோக்கிய யாத்திரைகளினால் மனிதர்களாகிய நம்மைப் பிடித்திருக்கும் நோய்கள் மட்டுமல்ல பாவங்களும் நீக்கப்படுகின்றன. அதன் காரணமாகவே அக்காலங்களில் மன்னர்களும் சாதாரண குடியானவன்களைப் போலவே தீர்த்த யாத்திரைகளை மேற்கொண்டனர். யாத்திரைப் பயணங்களைச் செய்து மீண்டும் தங்கள் இருப்பிடம் திரும்புபவர்கள் புண்ணியம் செய்தவர்களாக போற்றப்பட்டனர்.

Wednesday, 27 September 2017

இத்தனை மெனக்கெடல் அவசியமா?



நாள் : 1
எங்க மிஸ் கல்யாணத்துக்கு நீங்க என்ன கிஃப்ட் (GIFT) செய்யப் போறீங்க?
நான் செய்றது இருக்கட்டும். நீயும், உன் தம்பியும் என்ன செய்யப் போறீங்க?
நான் ஸ்டுடியோவுல காட்டுன மாடல் மாதிரி செஞ்சு கொண்டு வந்து தந்துடுங்க. அதை நாங்க கிஃப்டா செஞ்சிடுறோம்.
அதுக்கு போட்டோவெல்லாம் வேணுமே. மிஸ்கிட்ட யாரு கேட்கிறது?
நான் கேட்கிறேன்.
அலைபேசியில் பேசி முடித்ததும், மிஸ் தருறேன் சொல்லி இருக்காங்க.

Wednesday, 30 August 2017

வார்த்தைகளும், வடுக்களும்...



பணச் சிக்கனம், பொருள் சிக்கனம் தெரியும். வார்த்தைச் சிக்கனம் தெரியுமா? குடும்ப பிரச்சனைகளுக்கு இடையேயான விரிசல்கள் பெரிதாகாமல் இருக்க வேண்டுமானால் உங்களிடம் எப்பொழுதும் வார்த்தைச் சிக்கனம் என்ற வயாகரா இருந்து கொண்டேயிருக்க வேண்டும். 

எந்த மனைவியாது, “தொண, தொணன்னு பேசி நச்சரிக்காதீங்க”, “பேசிப் பேசியே கழுத்தை அறுக்காதீங்க” என கணவனைச் சொன்னதாக கேள்விப்பட்டிருக்கிறீர்களா? பல வீடுகளில் மனைவி கணவனின் காதோடு காது வைத்து ”கல்லுளிமங்கா”, “வாழைப்பழ சோம்பேறி”, “அழுத்தக்காரா”, “ஊமைக்கொட்டான்” எனச் செல்லமாக உசுப்பேற்றி, உசுப்பேற்றியே பேச வைக்கின்றனர். ஆனால், பெண்கள் அப்படி இல்லை. கணவனுக்கும், மனைவிக்கும் சேர்த்து பேச வேண்டும் எனச் சொன்னால் கூட அசராமல் பேசுவார்கள். ஒரு ஜோக். ஒரு பையன், “என்ன தலைப்பு கொடுத்தாலும் அதைப்பற்றி ஒரு மணிநேரம் எங்க அம்மாவால் பேச முடியும்” என்றான் பெருமையாக. உடனே அவனின் நண்பன், “இது என்ன பிரமாதம். எந்த தலைப்பும் இல்லாமலே ஒருநாள் முழுக்க கூட என் அம்மாவால் பேசமுடியும். உனக்கு சந்தேகம்னா எங்க அப்பாவைக் கேட்டுப் பாரேன்” என்றான். பேசுவதற்காகவே பிறந்தவர்கள் பெண்கள். அது அவர்களின் குணம். 

Friday, 28 July 2017

மாற்றம் – முன்னேற்றம் - வெற்றி



பிரபஞ்சத்தின் கோடான கோடி உயிர்களில் நீங்களும் ஒருவர்.  நீங்கள் எப்படிப்பட்டவராக இருக்க வேண்டும்? என்பதை நீங்கள் தான் தீர்மானம் செய்ய முடியும். மற்றவர்கள் வேண்டுமானால் வழிகாட்டலாம். ஆலோசனை தரலாம். ஆனால் மாற்றிக் கொள்வதும், மாறுவதும் உங்கள் கைகளில் தான் இருக்கிறது. அரசியல் முழக்கம் போல ”மாற்றம் – முன்னேற்றம் – வெற்றி“ என்பதை உங்களுக்கு நீங்களே சொல்லிக் கொள்ளுங்கள். அது உங்களை மட்டுமல்ல உங்களின் இலக்கினை நோக்கியும் முன்னேற வைக்கும்.

எத்தனை திறனுள்ள கப்பலாக இருந்தாலும் அதில் ஏற்படும் சிறு ஓட்டை கப்பலை மூழ்கடித்து விடும். அதேபோல நீங்கள் என்ன தான் திறனுடையவராக இருந்தாலும் சில புற, அகக் காரணிகளால் அதுவரையிலும் உங்களுக்குப் பழக்கபட்டிருக்கும் விசயங்களிலிருந்து வெளிவந்து அதில் தேவையான மாற்றங்களைச் செய்து கொள்ளும் போது உங்களின் செயல்பாட்டிற்கான ஊக்கம் இரு மடங்காகும். பத்தோடு பதினொன்று என்றில்லாமல் பத்தில் ஒன்றாய் இருக்க வேண்டுமானால் கீழ் உள்ள விசயங்களில் கவனம் செலுத்துவது அவசியம். அத்தியாவசியம்.

Monday, 24 July 2017

முடியும் என்ற நம்பிக்கை



கேள்வி கேட்பது எளிது. பதில் சொல்வது கஷ்டம் என்பதைப் போல “முடியும்” என்பதை விட “முடியாது” என்று சொல்வது இன்று ஈசியான செயலாகி விட்டது. எல்லோருக்குமானதைத் தனக்கானதாக ஏற்றுக் கொள்ளாதவர்களே வெற்றியாள்ர்களாக மிளிர்கின்றனர் என்ற விதி இங்கும் பொருந்திப் போகிறது. என்னால் முடியாது – இயலாது -  சாத்தியமில்லை -  வாய்பே இல்லை என்பதை எந்த நிலையிலும் வெற்றியாளர்கள் ஏற்றுக் கொள்வதே இல்லை. மாறாக தாங்கள் ஏற்றுக் கொள்ளும் வகையில் முடியும் – இயலும் – சாத்தியம் -  வாய்ப்புண்டு என்று மாற்றி அமைக்கின்றனர்.

எந்த ஒன்றை ஆரம்பிக்கும் போதும் அதை முடியும் என்று சொல்பவர்களை விட முடியாது என்று சொல்லி எதிர்மறை எண்ணங்களை நமக்குள் கடத்த நினைப்பவர்களுக்கு பஞ்சவே இருப்பதில்லை. அதற்காக அவர்கள் உங்கள் முன் வைக்கும் காரணம் மிகச் சரியாகப் பொருந்துவதாய் தெரியும். விட்டு விடலாம் என்ற மனநிலையை உருவாக்கும். அதில் சிக்காமல் தப்புகிறவர்கள் அடுத்த அடியை எடுத்து வைக்கின்றனர். மாறாக, அதற்குள் அகப்பட்டுக் கொள்பவர்கள் தங்களின் இலக்கில் இருந்து பின் வாங்கி விடுகின்றனர். இது போதும் என நிறைவு கொள்கின்றனர். வெற்றியாளர்களாக மாற நினைப்பவர்கள் அப்படி நின்று விடுவதில்லை. அவர்கள் மற்றவர்களை விடத் தன்னை மட்டுமே முழுமையாக நம்புகிறார்கள். அதனால் ஒருவேளை தோல்வி ஏற்பட்டாலும் அதைப் பற்றிக் கவலைப்படாமல் தங்கள் முயற்சிகளைத் தொடர்ந்து கொண்டே இருக்கிறார்கள். காரணம் சொல்பவர்கள் காரியங்களைச் செய்வதில்லை. காரியம் செய்ய முனைந்தவர்கள் காரணங்களுக்காகப் பின் வாங்குவதில்லை. அதற்காக தங்களின் நேரம் முழுமையையும் கொடுத்துப் பாடுபடுகின்றனர்.

Saturday, 15 July 2017

நகர்ந்து கொண்டே இருங்கள்



தேடல் உள்ள உயிர்களுக்கே வாழ்வில் ருசி இருக்கும் என்பது சினிமாவில் எழுதப்பட்ட வாழ்வியலைச் சொல்லும் பாடலின் வரி. வாழ்வின் ருசி மட்டுமல்ல வாழ்வும் கூட தேடல்களால் தான் சுவராசியமடைகிறது. தேடல்களோடு இருப்பவர்கள், ”இது என்ன வாழ்க்கை? செக்குமாட்டுத்தனமாய் இருக்கிறது” என்றெல்லாம் புலம்புவதில்லை. மாறாக, தங்களுக்குக் கிடைத்திருக்கும் இந்த வாழ்க்கையைத் தேடலின் வழியாக சுவராசியப்படுத்திக் கொள்கிறார்கள். எப்பொழுது தேடலை நிறுத்துகிறீர்களோ அப்பொழுது உங்கள் வாழ்க்கை உங்களிடமிருந்து பறி போய் விடுகிறது.

கேள்விகளுக்கு விடை தேடும் மனம் இருந்தால் மட்டுமே தேடல்களுக்கானத் தேவைகள் இருக்கும். அதற்காகவேனும் எப்பொழுதும் எதையாவது உங்களுக்கு நீங்களே கேட்டுக் கொண்டே இருங்கள். ஆம். ”உங்களுக்கு நீங்களே” என்பது இங்கு முக்கியம். இதில் மற்றவர்களை நுழைய அனுமதித்தால் விமர்சனம், அறிவுரை என ஏதோ ஒன்றின் பெயரில் அவர்கள் உங்களின் தேடல் முனைகளை முறித்து விடக் கூடும். எனவே இந்த விசயத்தில் உங்களுக்கு நீங்களே சுய தூண்டலைச் செய்து கொள்ளுங்கள்.

Tuesday, 11 July 2017

கனவை நனவாக்குங்கள்




கனவு காணாத மனிதர்களே இல்லை. கனவு என்பது நம்முடைய வாழ்க்கையோடு பின்னிப் பிணைந்த விசயமாகி விட்டது. அவரவர் விருப்பத்திற்கேற்ப ஒவ்வொருவருக்கும் கனவுகள் இருக்கவே செய்கிறது. இலக்கின் இன்னொரு பெயர் தான் “கனவு”. அதை அவரவர் மொழிக்கேற்ப ஆசை, விருப்பம், தேவை என அழைத்துக் கொள்கிறோம். அதன் காரணமாகவே மறைந்த அப்துல் கலாம் தன்னுடைய வாழ்நாள்; முழுக்கப் பள்ளிக் குழந்தைகள் தொடங்கி இளையோர்கள் வரை ”கனவு காணுங்கள்” என்று வலியுறுத்திக் கொண்டே இருந்தார். ஒரு இலக்கை எட்டுவதை முன் கூட்டியே மனதிற்குள் காட்சிப் படுத்திப் பார்த்து மகிழ்ச்சி கொள்வதையே கனவு என்று மனவியலாளர்கள் வரையறுக்கின்றனர். 

கனவுகளை நிலை நிறுத்துவதற்கான பிளாட்பார்ஃம் (BASEMENT) நம்முடைய மனம். மனமானது வெளி மனம், உள்மனம் என்ற இரண்டு அடுக்குகளாக இருக்கிறது. வெளிமனமானது எப்பொழுதும் கேள்விகளைக் கேட்டுக் கொண்டே இருக்கும். சரி என நீங்கள் தீர்மானிக்கும் விசயத்தை இல்லை என்றும், இல்லை என்றால் சரி என்றும் முரண்டு பிடிக்கும். மனதைக் குரங்காக வர்ணித்த கவிஞர் கண்ணதாசனின் வாக்கு பொய்யில்லை. மனதை உங்கள் கட்டுப்பாட்டிற்குள் வைத்திருந்தால் மட்டுமே வெளி மனதைத் தாண்டி உங்களால் இயங்க முடியும். அதனால் தான் தியானம், யோகா போன்ற பயிற்சி வகுப்புகளில் முதலில் மனதை ஒழுங்கு செய்யவும், கட்டுப்படுத்தவும் கற்றுத் தருகிறார்கள்.

Wednesday, 5 July 2017

தோல்வியிலிருந்து வெற்றி


தமிழில் எனக்குப் பிடிக்காத வார்த்தை “மன்னிப்பு” என ஒரு திரைப்படத்தில் விஜயகாந்த் பேசும் வசனம் போல நம்மில் பலருக்கும் பிடிக்காத வார்த்தை “தோல்வி”. அப்படியிருக்க எப்படி தோல்வியிலிருந்து வெற்றி பெற முடியும்? நீங்கள் விரும்பாத தோல்வியை உங்களுக்குப் பிடித்ததாக மாற்றிக் கொண்டால் முடியும். அப்படி மாற்றிக் கொள்வது ஒன்றும் பெரிய கம்ப சூத்திரமல்ல.

தோல்வியிலிருந்து பாடம் படியுங்கள். தோல்வியை அனுபவமாக மாற்றுங்கள் என்று எங்கும் பேசுவதைக் கேட்கிறோம். எழுதுவதை வாசிக்கிறோம். ஆனால் அதைக் கடைப்பிடிக்கிறோமா? இந்தக் கேள்விக்கு நம்மில் பலரிடமும் தீர்க்கமான பதில் இருப்பதில்லை, தீர்க்கமான பதில்களை வைத்திருப்பவர்கள் தோல்விகளைக் கண்டு துவள்வதில்லை. அதையேத் தன் அடுத்த முயற்சிக்கான ஆரம்பமாக மாற்றிக் கொண்டு முன்னேறிச் செல்கின்றனர். அதனால் தோல்வி என்று நீங்கள் நினைக்கும் நிலையை இறுதியாக்கி அங்கேயே முடங்கி விடாமல் முன்னோக்கி நகர்ந்து கொண்டே இருங்கள். உடைந்து போய் விடாமல் அதிலிருந்து ஊட்டத்தைப் பெறுங்கள். அப்படி நகர்ந்தவர்களும், பெற்றவர்களும் மட்டுமே சாதித்திருக்கிறார்கள். வெற்றியாளராக தங்களை அடையாளப்படுத்தி இருக்கிறார்கள்.

Tuesday, 4 July 2017

தாஜ்மகால்

  • இந்தியாவின் ஆக்ரா நகரில் யமுனை நதிக்கரையில் அமைந்துள்ளது. முகலாய அரசர் ஷாஜஹானால் அவர் மனைவி மும்தாஜின் நினைவாகக் கட்டப்பட்டது.
  • இராஜபுத்திர மன்னர் ஜெய்சிங்கிற்குச் சொந்தமான தோட்டமாக இருந்த இந்த இடம் பண்டமாற்று முறை மூலம் வேறு இடங்கள் கொடுத்துப் பெறப்பட்டது.
  • பாரசீக, முகலாயக் கட்டடக் கலை மரபுகளை உள்ளடக்கி தைமூர் சமாதி, ஹிமாயூன் சமாதி, டெல்லி ஜும்மா மசூதி ஆகிய கட்டியங்களின் வடிவமைப்பை அடிப்படையாகக் கொண்டு தாஜ்மகாலுக்கான வரைபடம் உருவாக்கப்பட்டது.
  • வெனிஸ் நகரச் சிற்பிவெரொனியோ”, துருக்கி நாட்டு கட்டிடக் கலைஞர்உஸ்தாத் இஷாகான்”, லாகூரைச் சேர்ந்தஉஸ்தாத் அகமதுஆகியோருடன் ஷாஜஹானும் இணைந்து வடிவமைத்த வடிவமைப்பு   தாஜ்மகால்!
  • தாஜ்மகாலைக் கட்டும் பணி 1631 – ல் தொடங்கியது.

Thursday, 29 June 2017

தன் அனுபவமாக்குங்கள்



இன்றே -  இப்பொழுதே - இக்கணமே என்பது வெற்றியாளர்களின் வேதவாக்கு, இதன் உட்பொருள் உங்களின் செயலைத் தாமதிக்காமல் ஆரம்பியுங்கள் என்பதாகும். இதைப் படித்ததும் நானும் உடனே ஆரம்பிக்க வேண்டும் எனக் கிளம்பினீர்களேயானால் சுவற்றில் அடித்த பந்தாகத் திரும்பி புறப்பட்ட இடத்திற்கே வந்து சேர்ந்து விடுவீர்கள். நடைமுறையில் உணர்ச்சி வயப்பட்டெல்லாம் எதையும் செய்து சினிமாக் கதாநாயகன் போல் ஒரே நாளில் வெற்றியைச் சுவிகரித்து விடமுடியாது. அதற்கு நிறைய முன் தயாரிப்புகள் தேவையாக இருக்கிறது. 

புதிதாக ஒரு தொழில் தொடங்கி நடத்த வேண்டும்  என்பது  உங்களின் இலக்கு என வைத்துக் கொள்வோம். அதைச் செயலாக்குவதற்கு முன் அந்தத் தொழில் பற்றிய அடிப்படை அறிவு (BASIC KNOWLEDGE)  உங்களுக்கு இருக்க வேண்டும்.

ஒரு இளைஞன் இரயில் தடங்களை மாற்றி விடும் வேலைக்குச் சேர்ந்திருந்தான். முதல் நாள் பயிற்சி ஆரம்பமானது. இரண்டு இரயில்கள் வந்து கொண்டிருந்தன. அதன் தடங்களை மாற்றி விட வேண்டியவனோ தலை தெறிக்க ஒரு பெயரை உரக்கச் சொல்லிய படியே ஓடினான். காரணம் புரியாமல் நின்ற அதிகாரிகள் அவனைப் பிடித்து வந்து விசாரித்தனர். அதற்கு அவன் இதுவரை என் அண்ணனும் இரண்டு இரயில்கள் நேருக்கு நேர் மோதிப் பார்த்ததில்லை சார். அதான் அவனையும் அழைத்து வர ஓடினேன் என்றானாம். அடிப்படை அறிவு இல்லாவிட்டால் என்னவாகும் என்பதற்கு இந்தக் கதையை நிர்வாக மேலாண்மை வகுப்புகளில் அடிக்கடிச் சொல்வார்கள். அடிப்படை அறிவு என்பது அனைத்திற்கும் முக்கியம். அதில் தேர்ச்சி பெற்றால் மட்டுமே முன் அனுபவம் என்ற அதற்கு அடுத்த நிலைக்குச் செல்ல முடியும்.

Saturday, 24 June 2017

மனநிலையை மாற்றுங்கள்




எல்லோரும், எப்பொழுதும் நம்மை ஏற்றுக் கொள்ள வேண்டும். நம் செயல்களை அங்கிகாரம் செய்ய வேண்டும் என நினைப்பது மனித இயல்பு. உண்மையில் அப்படி எதுவும் நிகழ்வதில்லை. உறவுகளுக்கிடையேயான பெரும்பாலான  விரிசல்கள் இப்படியான நிராகரிப்புகளாலயே உருவாகின்றன. சாதாரண விசயங்களுக்கே இப்படியான நிலை என்கின்ற போது வெற்றி சார்ந்த முயற்சிகளுக்கு கேட்கவே வேண்டாம். ஆனால் இப்படியான மறுப்புகளைக் கடந்து வெற்றியை வசப்படுத்துவதில் தான் உங்களுடைய அடையாளம், தனித்தன்மை அடங்கி இருக்கிறது.

ஒருவர் தன்னுடைய அனுமானம், அபிமானம் அல்லது அவருக்கு அது சார்ந்து முன்னர் கிடைத்த அனுபவம் மூலமாக மட்டுமே உங்களையும்,  உங்கள் செயல்களைப் புறக்கணிக்கிறார். அவருக்குள் இருக்கும் சில முன் முடிபுகள் அப்படியான புறக்கணிப்புகள் உருவாகக் காரணமாக அமைகின்றன. இந்த எதார்த்த நிலையை உணராமல் உங்களின் செயல் அங்கீகரிக்கப்படவில்லை என்று சொல்லிக் கொண்டு அதைக் கைவிட்டு விட்டால் ஒருநாளும் உங்களால் வெற்றி பெற முடியாது. மற்றவர்களின் விருப்பத்திற்குத் தன்னை வளையக் கொடுப்பவர்களால் ஒருநாளும் சாதிக்க முடியாது.

Wednesday, 21 June 2017

கொஞ்சம் கவனியுங்கள் ஆசான்களே!



விடுமுறை முடிந்து பள்ளிக்குத் திரும்பிய மகள் விடுமுறையில் செய்து வர வேண்டும் என பள்ளியில் சொல்லி அனுப்பி இருந்த "அசைன்மெண்ட்" களை செய்து முடித்து கத்தை கத்தையாக அடுக்கி வைத்திருந்தாள்.


"லீவுக்கு தந்த எல்லா அசைன்மெண்ட்டையும் முடிச்சிட்டேன் டாடி. இந்தி மட்டும் படிக்க முடியல. ஜி திட்டுவாங்க" என வருத்தத்தோடு சொல்லிக் கொண்டிருந்தாள்

லீவுன்னா படிக்கனுமா? ஜி கேட்டா ஊருக்கு போயிருந்தேன்னு சொல்லு" எனச் சொல்லி அனுப்பி இருந்தேன்.

"பள்ளியில் இருந்து திரும்பியவளிடம் முதல் நாள் வகுப்பு எப்படி? அசைன்மெண்டெல்லாம் .கே.யா? "என்றேன்.

அவளோ மிகுந்த சலிப்புடன்," அடப்போங்க டாடி. எல்லாமே வேஸ்ட்டாயிடுச்சு. மிஸ் எதுவுமே கேட்கவில்லை. அபி (அவள் தம்பி) சொன்ன மாதிரி மிஸ் மறந்துட்டாங்க போல" என்றபடி பள்ளிக்கு உற்சாகமாய் எடுத்துச் சென்ற அசைன்மெண்டுகளை தன் அலமாரியில் வைத்துக கொண்டிருந்தாள்.

ஆசான்களே......ஆசிரியப் பெருந்தகைகளே......விடுமுறைகளை பிள்ளைகள் முழுமையாகக் கொண்டாட விடுங்கள். அல்லது அந்த விடுமுறையில் பிள்ளைகளுக்குத் தந்த திட்டங்களை பெயரளவிற்காவது பார்த்து உற்சாகப் படுத்துங்கள். அதன் வழி அவர்கள் பெறும் சந்தோசம் இன்னும் சிறப்பாய் அவர்களை இயங்க வைக்கும்.

உங்களின் பாராமுகம் அவர்களின் இயல்பூக்கத்திற்கு தடையாக இருக்க வேண்டாமே


Tuesday, 20 June 2017

மூளைதனமும் – தொலைநோக்கும்!



சில வருடங்களுக்கு முன் நான் பணிபுரிந்த நிறுவனம் நடத்திய மேம்பாட்டுத் திறன் சார்ந்த பயிலரங்கில் ஊழியர்களிடம் சில கேள்விகள் அடங்கிய தாள்கள் தரப்பட்டு ஒவ்வொருவரிடமிருந்தும் தனித்தனியாகப் பதில்கள் பெறப்பட்டன. அதில் ஒரு கேள்வி. வாழ்வில் முன்னேற என்ன தேவை? மூளைதனமா? மூலதனமா? நான் உள்பட பலரும் எழுதிக் கொடுத்திருந்த பதில் என்னவாக இருக்கும் என்பதைச் சொல்ல வேண்டியதில்லை. பதில்கள் பெறப்பட்ட பின் பயிலரங்கை நடத்தியவர் மூலதனம் மட்டும் இருந்தால் வழ்க்கையை வெற்றி பெற்று விட முடியும் என நினைக்கிறீர்களா? என்ற போது கோரசாய் ஏன் முடியாது? என்று கேட்டோம். அப்படியானால் உங்கள் ஊரில் அல்லது உங்கள் உறவினர்களில், உங்களுக்குத் தெரிந்தவர்களில் பணக்காரர்களாக இருப்பவர்களில் எத்தனை பேர் வெற்றியாளர்களாக இருக்கிறார்கள்? என்று அவர் திருப்பிக் கேட்ட போது எங்களிடம் பதில் இல்லை.

அன்று வரை பணம் இருந்தால் போதும் வாழ்க்கையை ஜெயித்து விடலாம். செல்வச் செழிப்புகளோடு இருப்பவர்களே வாழ்க்கையில் வெல்கிறார்கள் என எல்லோரையும் போலவே நானும் நம்பிக் கொண்டு தான் இருந்தேன். உண்மையில் அது தவறான கருத்து. அப்படியான ஒன்றைத் தொடர்ந்து நாம் கேட்டுக் கேட்டு பழகி விட்டதால் அது நம் உள் மனங்களில் பதிந்து அது தான் நிஜம் என நம்ப வைத்துக் கொண்டிருக்கிறது. அம்பானியைவும், டாட்டாவையும், வாரன் பெப்பட்டையும், பில்கேட்சையும் வெறும் பணக்காரர்களாக மட்டுமே பார்த்து வருகிறோமேயொழிய அவர்களை நாம் ஒரு தொழில் விற்ப்பனர்களாக பார்க்கப் பழகவில்லை. முதலீடுகள் மட்டும் அவர்களை வெற்றியாளர்களாக மாற்றவில்லை. அவர்கள் தங்களின் மூளையை முதலாய் உருமாற்றிக் கொண்டிருக்கிறார்கள். அது தான் அவர்களை வெற்றியாளர்களாக அடையாளப்படுத்திக் கொண்டிருக்கிறது. இந்த மூளைதனம் இல்லாததால் தான் நம் ஊர் பணக்காரர்கள் அஞ்சுக்கும், பத்துக்கும் வட்டித் தொழில் செய்து அமைந்தக்கரையில் வீடு வாங்க முடியுமா? என யோசித்துக் கொண்டிருக்கிறார்கள். 

Friday, 16 June 2017

பகிர்ந்து செய்யுங்கள்



இலக்கு, திட்டமிடல் ஆகியவைகளில் நம்மில் பலருக்கும் இருக்கும் தெளிவு அது சார்ந்த செயல்களைச் செய்யும் போது இருப்பதில்லை. ஒரு வேலையை எப்படிச் செய்ய வேண்டும் என்பதே இன்று பலருக்கும் தெரிவதில்லை. வேலையை முடிக்க வேண்டும் என்ற ஆர்வம் மட்டும் இருந்தால் போதாது. அதை எப்படிச் செய்தால் முடிக்க முடியும் என்பதும் தெரிந்திருக்க வேண்டும். இந்தத் தெளிதலும், தெரிதலும் இருந்தால் போதும் வெற்றியை உங்கள் பக்கம் சாய்த்து விட முடியும், அதற்கு உங்களுடைய வேலைகளைப் பகிர்ந்து செய்ய வேண்டியது அவசியம்.  

எல்லா வேலைகளையும் நீங்களே செய்ய ஆரம்பிக்கும் போது உங்களுடைய வேலையைச் சிறப்பாகச் செய்ய முடியாது. உதாரணமாக குழுவாகச் செயல்படும் ஒரு பணியில் நீங்கள் அதன் தலைமைப் பொறுப்பை (TEAM LEADER) ஏற்றிருக்கிறீர்கள்  என வைத்துக் கொள்வோம். அங்கே உங்களின் பணி என்பது உங்களோடு   செயல்படுபவர்களில் தகுதியாவனர்களைத் தேர்ந்தெடுத்து அவர்களுக்குரிய வேலைகளைப் பகிர்ந்து கொடுப்பதும், அவர்களின் செயல்பாடுகளை ஒருங்கிணைத்துக் குறித்த காலத்தில் அந்த வேலையை முடிப்பதும் மட்டுமே!  ஆனால் அக்குழுவின் தலைவர் என்பதற்காக எல்லா வேலைகளிலும் நீங்களே முன் நிற்பதோ, அவைகளைச் செய்ய முனைவதோ குறித்த காலத்தில் அந்த வேலையை நிறைவு பெற வைக்காது என்பதோடு கருத்து வேறுபாடுகளையும் உருவாக்கி விடும். இந்தச் செயல்பாட்டு நடைமுறையை மிகச் சரியாகப் பின்பற்றிச் செயல்படும் குழு ”பெஸ்ட் டீம்” (BEST TEAM) என்ற அடையாளத்தைப் பெறுகிறது. 

தலைமைப் பொறுப்பில் இருப்பவர்களுக்கான பயிற்சி வகுப்புகளில் ஒரு போதும் உங்களின் உதவியாளர் செய்ய வேண்டிய வேலையை நீங்கள் செய்ய முனையாதீர்கள் என்ற ஆலோசனை கட்டாயம் இருக்கும். நேர மேலாண்மைக்கு இது மிகவும் முக்கியம்.  வெற்றிக்கான முனைப்பில் இருப்பவர்கள் தங்களுக்குக் கிடைக்கிற ஒவ்வொரு மணித்துளியையும் இலக்கு நோக்கிச் செலுத்த வேண்டுமேயொழிய அதிலிருந்து விலகி நிற்கும் விசயங்களுக்குச் செலவழிக்க முனையக் கூடாது.

மனைவிக்கு ஒழுங்காகப் பொருட்கள் வாங்கத் தெரியாது என நேரத்தைச் செலவிட்டு காய்கறிக்கடைக்குச் சென்று வருவது, மகனுக்குப் பணம் செலுத்தத் தெரியாது என தவணைத் தொகைகளைக் கட்ட வங்கிக்குச் சென்று வரிசையில் காத்திருப்பது, மகளுக்கு உதவுகிறேன் எனச் சொல்லிக் கொண்டு அவர்களின் வேலைகளில் தங்களின் நேரத்தைச் செலவு செய்வது என அவசியமற்றவைகளுக்காக மதிப்பில்லா நேரங்களை விரயமாக்கிக் கொண்டிருக்காதீர்கள். அவர்களுக்குத் தெரியவில்லை என்றால் ஒருநாள் முழுக்கச் செலவிட்டேனும் அதைக் கற்றுக் கொடுத்து விடுங்கள். அதன்பின் உங்களின் பல மணி நேரம் மிச்சமாகும். எனக்கே எல்லாம் தெரியும் என்ற மனநிலையாலும்,  நானே செய்தால் தான் எனக்குத் திருப்தியாய் இருக்கும் என்ற பிடிவாதத்தாலும் சிறிய வேலைகளில் உங்களின் நேரத்தை கரைத்துக் கொள்ளாதீர்கள்.

உங்களுக்கான நேரத்தை ஆக்கப்பூர்வமான வகையில் செலவழியுங்கள்.  முறையான திட்டமிடலின் மூலம் அதைச் செய்ய முடியும் என்பதை எனக்கு மேலாளராக இருந்தவரிடமிருந்து நான் கற்றுக் கொண்டேன். அதை உங்களுக்கும் சொல்கிறேன். வருட ஆரம்பத்தில் டேபிள் காலண்டர் வந்ததும் அவர் செய்யும் முதல் வேலை அதில் கட்டாயமாக ஒவ்வொரு மாதமும் செய்ய வேண்டிய வேலைகள், வாரியங்களுக்குக் கட்டணங்கள் செலுத்த வேண்டிய தேதிகளை அடையாளப்படுத்திக் கொள்வார். இப்போது அந்த வருடத்தில் கட்டாயமாகச் செய்ய வேண்டிய வேலைகள் தெரிந்து விடும். அந்தக் காலண்டரைத் தன் எதிரில் படும் படி வைத்திருப்பார். 

தினமும் காலையில் அலுவலகம் வந்ததும் காலண்டரில் அன்றைய தேதியில் இருக்கும் வேலைகளையும், அன்று செய்ய வேண்டிய வேலைகளையும் வரிசைப்படுத்தி ஒரு குறிப்பேட்டில் எழுதிக் கொள்வார். முதலில் எந்த வேலையைச் செய்வது உள்பட எல்லாவற்றையும் திட்டமிட்ட பின்னரே வேலைகளைத் தொடங்குவார். ஒரு நேரத்தில் ஒரு வேலை என்பதில் உறுதியாக இருப்பதால் அந்த வேலை முடியும் வரை அதில் மட்டுமே கவனம் செலுத்திக் கொண்டே இருப்பார் அந்த வேலை முடியாது போனால் அதற்கான காரணத்தைக் குறிப்பேட்டில் குறித்து வைத்து விட்டு அடுத்த வேலையை ஆரம்பிப்பார். அதே நேரம் ஒத்தி வைத்த வேலையை முடிப்பதற்கான நடவடிக்கைகளையும் எடுத்துக் கொண்டே இருப்பார்.

ஒவ்வொரு நாளும் வேலை நேரம் முடிவதற்கு முன் நடைபெறும் ஊழியர் கூட்டத்திற்கு அந்தக் குறிப்பேட்டோடு ஆஜராகி விடுவார். அதில் அவர் குறித்திருக்கும் வேலைகள் பெரும்பாலும் முடிந்து விட்டதற்கு அடையாளமாக சிவப்பு மையால் கோடிடப் பட்டிருக்கும். அவரின் சொந்த வேலைகளைக் கூட அவ்வாறு பட்டியலிட்டு வைத்திருப்பதைப் பல நேரங்களில் பார்த்திருக்கிறேன். இது எப்படி எல்லா நேரமும் சாத்தியம்? என ஒருமுறை அவரிடம் கேட்டேன். 

இந்தக் குறிப்பேட்டில் வேலைக்கான இன்றைய இலக்கும், அதை அடைவதற்கான திட்டமிடலும் மட்டும் தான் இருக்கிறது. ஆனால் இதில் இருக்கும் எல்லா வேலைகளையும் நானே செய்வதில்லை, நான் மட்டுமே செய்ய வேண்டியவைகளைத் தவிர்த்து  மற்றவைகளை அதற்குரியவர்களிடம் கொடுத்து அது சரியாக நடைபெறுகிறதா? என்று மட்டும் கண்காணிக்கிறேன். வேலை செய்வதில் அவர்களும், கண்காணிப்பதில் நானும் முழு கவனம் செலுத்துவதால் குறிப்பிட்ட நேரத்திற்குள் அன்றைய வேலைகளை முடித்து விட முடிகிறது. பத்தாண்டுகாலமாக இதைத் தான் நான் கடைப் பிடித்து வருகிறேன் என்றார். இப்பொழுது எனக்குப் போலவே உங்களுக்கும் புரிந்திருக்குமே வெற்றியாளர்கள் கடைப்பிடிக்கும் சூத்திரம்!

எந்த வேலையை நானே செய்ய வேண்டும்? எதைப் பிறரிடம் கொடுக்க வேண்டும்? பகிர்ந்து செய்ய வேண்டிய வேலைகள் எவை? என்ற பட்டியலைத் தயார் செய்து கொள்ளுங்கள். அதன் படி உங்களுடைய செயல்பாடுகளை அமைத்துக் கொள்ளுங்கள். அப்படிச் செய்யும் போது செயலின் மீது ஒருமித்த கவனத்தை உங்களால் செலுத்தமுடிவதோடு பல மணி நேரங்களைச் சேமிக்கவும் முடியும்,

ஒருமித்த கவனத்தோடும், போதிய அளவு நேரக் கையிருப்போடும் செய்யும் வேலைகளில் தொய்வு ஏற்படாது. அயர்ச்சி வராது. உற்சாகம் தானாகவே பற்றிக் கொள்ளும். உற்சாகத்தோடு உங்களுடைய வேலையைச் செய்வதை விடவும் வேறென்ன சந்தோசம் வேண்டும் உங்களுக்கு?

நன்றி : அச்சாரம் மாத இதழ்